ឯកឧត្តម ម៉ៅ ធនិន ដាក់ឱសានវាទ ១សប្តាហ៍ឱ្យម្ចាស់សំណង់កាយដី និងរុះរើបេតុងដែលរំលោភដីចំណីព្រែកកំពតចេញវិញជាបន្ទាន់

ខេត្តកំពត. នៅព្រឹកថ្ងៃទី២៤ ខែមីនា ឆ្នាំ២០២៦ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត បានដឹកនាំមន្ត្រីជំនាញចុះពិនិត្យផ្ទាល់នូវករណីរំលោភបំពានដីចំណីព្រែក ដែលជាសម្បត្តិសាធារណៈរបស់រដ្ឋ ស្ថិតក្នុងភូមិអង្គ សង្កាត់ត្រើយកោះ ក្រុងកំពត។

តាមការពិនិត្យជាក់ស្តែងនៅទីតាំងខាងលើ អាជ្ញាធរបានរកឃើញការសាងសង់ចាក់បេតុងការពារច្រាំង និងការចាក់ដីរំលោភចូលក្នុងចរន្តទឹកព្រែកយ៉ាងខុសច្បាប់។ ទាក់ទិននឹងករណីនេះ ឯកឧត្តមអភិបាលខេត្ត បានដាក់បទបញ្ជាយ៉ាងម៉ឺងម៉ាត់ ដោយទុកឱកាសឱ្យម្ចាស់ទីតាំងរយៈពេល ១សប្តាហ៍ជាកំហិត ដើម្បីធ្វើការកាយដី និងរុះរើសំណង់បេតុងទាំងនោះចេញវិញទាំងអស់ ដើម្បីស្ដារស្ថានភាពដីឱ្យមកសភាពដើមវិញ។

វិធានការក្ដៅនេះ ធ្វើឡើងក្នុងគោលបំណងការពារផលប្រយោជន៍សាធារណៈ និងថែរក្សាសម្រស់ធម្មជាតិនៃដងព្រែកកំពត ដែលជាបេះដូងនៃវិស័យទេសចរណ៍។ ជាមួយគ្នានេះ អាជ្ញាធរក្រុងកំពត និងមន្ទីរជំនាញ ពាក់ព័ន្ធនឹងបន្តតាមដានការអនុវត្តវិធានការនេះឱ្យមានប្រសិទ្ធភាពបំផុត ដើម្បីធានាថាការអភិវឌ្ឍនានាត្រូវតែអនុលោមតាមច្បាប់ និងមិនប៉ះពាល់ដល់បរិស្ថាន។