ឯកឧត្តម ម៉ៅ ធនិន អញ្ជើញជាអធិបតីក្នុងពិធីក្រុងពាលីសាងសង់ស្ពាន និងផ្លូវក្រវ៉ាត់ក្រុង ជាអំណោយដ៏ថ្លៃថ្លារបស់ សម្តេចធិបតី ហ៊ុន ម៉ាណែត នៅខេត្តកំពត

កំពត៖ រសៀលថ្ងៃទី១០ ខែវិច្ឆិកា ឆ្នាំ២០២៥, ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត បានអញ្ជើញជាអធិបតីភាពដ៏ខ្ពង់ខ្ពស់ក្នុង ពិធីក្រុងពាលី បើកការដ្ឋានសាងសង់ស្ពាន និងផ្លូវក្រវ៉ាត់ក្រុងថ្មីមួយខ្សែ ដែលជា អំណោយដ៏ថ្លៃថ្លា របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

គម្រោងអភិវឌ្ឍន៍នេះ នឹងតភ្ជាប់ការធ្វើដំណើរឆ្លងកាត់ ព្រែកកំពង់បាយ ឆ្ពោះទៅកាន់ ភូមិត្រើយកោះ សង្កាត់ត្រើយកោះ ក្រុងកំពត។

ពិធីក្រុងពាលី ត្រូវបានប្រារព្ធធ្វើឡើងតាមគន្លងប្រពៃណីសាសនា ដើម្បីបួងសួងសុំសេចក្តីសុខសេចក្តីចម្រើន និងជោគជ័យក្នុងការសាងសង់សំណង់ហេដ្ឋារចនាសម្ព័ន្ធដ៏មានសារៈសំខាន់នេះ។

ស្ពាន និងផ្លូវក្រវ៉ាត់ក្រុងថ្មីនេះ រំពឹងថានឹងជួយសម្រួលដល់ការកកស្ទះចរាចរណ៍ក្នុងក្រុងកំពត ជាពិសេសនៅរដូវបុណ្យទាន និងថ្ងៃឈប់សម្រាកនានា ក៏ដូចជាលើកកម្ពស់សោភ័ណភាព និងវិស័យទេសចរណ៍ក្នុងខេត្តកំពតទាំងមូល។

គម្រោងសាងសង់ស្ពាន និងផ្លូវក្រវ៉ាត់ក្រុងនេះ គឺជាសមិទ្ធផលថ្មីមួយទៀតដែលកើតចេញពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត ក្នុងគោលដៅអភិវឌ្ឍន៍ហេដ្ឋារចនាសម្ព័ន្ធរូបវ័ន្ត ដើម្បីបម្រើផលប្រយោជន៍ និងលើកកម្ពស់ជីវភាពរស់នៅរបស់ប្រជាពលរដ្ឋក្នុងខេត្តកំពត។