អភិបាលស្រុកឈូក នាំយកអំណោយមនុស្សធម៌របស់អនុសាខាកាកបាទក្រហម ផ្ដល់ជូនគ្រួសាររងគ្រោះដោយអគ្គិភ័យ និងមន្ត្រីមានជំងឺ - សារព័ត៌មាន មករា

(កំពត)៖ ដោយមានការចង្អុលបង្ហាញពីសំណាក់ ឯកឧត្ដម ម៉ៅ ធនិន អភិបាលនៃគណៈអភិបាលខេត្តកំពត និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ស្របតាមស្មារតី “កាកបាទក្រហមកម្ពុជាមាននៅគ្រប់ទីកន្លែង សម្រាប់គ្រប់ៗគ្នា” នារសៀលថ្ងៃអង្គារ ទី១០ ខែកុម្ភៈ ឆ្នាំ២០២៦ លោក សៅ មឿន អភិបាលស្រុកឈូក និងជាប្រធានកិត្តិយសអនុសាខាកាកបាទក្រហមកម្ពុជាស្រុក បានដឹកនាំក្រុមការងារចុះសួរសុខទុក្ខ និងនាំយកអំណោយសង្គ្រោះបន្ទាន់ផ្ដល់ជូនគ្រួសាររងគ្រោះចំនួន ០២ គ្រួសារ ក្នុងភូមិមនោសុខ ឃុំតាកែន។

សកម្មភាពចុះជួយដល់មូលដ្ឋានផ្ទាល់
ក្នុងបេសកកម្មមនុស្សធម៌នេះ លោកអភិបាលស្រុកបានអញ្ជើញសួរសុខទុក្ខ និងលើកទឹកចិត្តដល់៖
លោក ង៉ែត វណ្ណហួត (អាយុ ៤៦ ឆ្នាំ)៖ ដែលកំពុងជួបការលំបាកខ្លាំងក្រោយរងគ្រោះដោយអគ្គិភ័យឆេះផ្ទះសម្បែង។

លោក ខៀវ តេង (អាយុ ៧៣ ឆ្នាំ)៖ មេឃុំតាកែន ដែលជាមន្ត្រីមូលដ្ឋានដ៏សកម្ម ប៉ុន្តែបច្ចុប្បន្នកំពុងមានជំងឺប្រចាំកាយសម្រាកព្យាបាលនៅផ្ទះ។

ការឧបត្ថម្ភគាំទ្រផ្នែកជីវភាព និងថវិកា
ដើម្បីជួយសម្រាលការលំបាកចំពោះមុខ អនុសាខាកាកបាទក្រហមស្រុកឈូក បានបែងចែកជំនួយដូចខាងក្រោម៖

សម្រាប់គ្រួសាររងគ្រោះដោយអគ្គិភ័យ៖ ទទួលបានអង្ករ ២៥គីឡូក្រាម, មី ១កេស, ទឹកត្រី ១យួរ, ធុងចម្រោះទឹក ១, ចង្ក្រានសន្សំសំចៃ ១, ឆ្នាំងបាយ ២, មុង ភួយ កន្ទេល និងថវិកាលើកទឹកចិត្តចំនួន ២០០,០០០ រៀល។

សម្រាប់លោកមេឃុំមានជំងឺប្រចាំកាយ៖ ទទួលបានអង្ករ ២៥គីឡូក្រាម, ទឹកសុទ្ធ ២កេស, មី ១កេស, ទឹកផ្លែឈើ ១កេស និងថវិកាសម្រាប់ការព្យាបាលចំនួន ៤០០,០០០ រៀល។

ប្រសាសន៍ផ្ដាំផ្ញើ និងការអំពាវនាវ
ក្នុងឱកាសនោះ លោក សៅ មឿន បានពាំនាំនូវការសាកសួរសុខទុក្ខយ៉ាងជ្រាលជ្រៅពីសំណាក់ ឯកឧត្ដម ម៉ៅ ធនិន ជូនដល់គ្រួសាររងគ្រោះ។ ជាមួយគ្នានេះ លោកអភិបាលស្រុកបានអំពាវនាវដល់បងប្អូនប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នខ្ពស់ចំពោះបញ្ហាអគ្គិភ័យ (ភ្លើងទៀន ធូប ចង្ក្រាន និងចរន្តអគ្គិភ័យ) ជាពិសេសក្នុងរដូវប្រាំងដែលងាយនឹងកើតមានគ្រោះមហន្តរាយ។ លោកក៏បានបួងសួង និងជូនពរដល់លោកមេឃុំ ខៀវ តេង ឱ្យឆាប់រឹងមាំ និងមានសុខភាពល្អឡើងវិញ ដើម្បីបន្តដឹកនាំបម្រើប្រជាពលរដ្ឋក្នុងឃុំតាកែនឱ្យកាន់តែរីកចម្រើន។