រដ្ឋបាលស្រុកទឹកឈូ៖ ចុះសម្របសម្រួលដោះស្រាយវិវាទជូនយុទ្ធជនជួរមុខ ក្រោមការចង្អុលបង្ហាញដ៏ខ្ពង់ខ្ពស់របស់ ឯកឧត្តមអភិបាលខេត្ត - សារព័ត៌មាន មករា

(ស្រុកទឹកឈូ, ខេត្តកំពត)៖ នាថ្ងៃទី០៨ ខែកុម្ភៈ ឆ្នាំ២០២៦ លោក អុឹម ច័ន្ទសោធន អភិបាលនៃគណៈអភិបាលស្រុកទឹកឈូ បានដឹកនាំក្រុមការងារជំនាញ ចុះជួបសំណេះសំណាល និងសម្របសម្រួលដោះស្រាយវិវាទសំណង់ដោយផ្ទាល់ជូន លោក ឈឹម ថារឹត ដែលជាយុទ្ធជនជួរមុខ។

សកម្មភាពចុះដោះស្រាយដល់ទីតាំងផ្ទាល់នេះ គឺធ្វើឡើងតាមការចង្អុលបង្ហាញយ៉ាងម៉ឺងម៉ាត់ និងយកចិត្តទុកដាក់បំផុតពីសំណាក់ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត ដែលជានិច្ចកាល ឯកឧត្តមតែងតែគិតគូរ និងផ្សារភ្ជាប់សុខទុក្ខជាមួយបងប្អូនប្រជាពលរដ្ឋនៅគ្រប់ពេលវេលា និងគ្រប់ទីកន្លែង។

ជាលទ្ធផលនៃជំនួបពិភាក្សានេះ៖ ការទទួលយកសំណូមពរ៖ លោកអភិបាល ស្រុក បានស្ដាប់នូវការរៀបរាប់ និងទទួលយកសំណូមពរចំនួន ០២ចំណុច របស់លោក ឈឹម ថារិត ដើម្បីពិនិត្យ និងដោះស្រាយទៅតាមនីតិវិធីច្បាប់ប្រកបដោយយុត្តិធម៌។

មូលហេតុនៃការបង្អង់៖ ដោយសារភាគីម្ចាស់សំណង់ កំពុងអវត្តមានក្នុងបេសកកម្មនៅប្រទេសវៀតណាម ដែលជាហេតុធ្វើឱ្យការសម្របសម្រួលមិនទាន់អាចបិទបញ្ចប់ជាស្ថាពរភ្លាមៗក្នុងថ្ងៃនេះ។

ការកំណត់ឱសានវាទ៖ ម្ចាស់សំណង់បានសន្យា និងសុំពេលកំណត់ ០១សប្តាហ៍ ដើម្បីបិទបញ្ចប់ករណីនេះឱ្យបានសព្វគ្រប់ នៅពេលដែលភាគីម្ចាស់សំណង់ត្រឡប់មកវិញ។

លោក អ៊ឹម ច័ន្ទសោធន បានបញ្ជាក់ជំហរថា រដ្ឋបាលស្រុកនឹងបន្តអនុវត្តតាមគំរូដ៏ខ្ពង់ខ្ពស់របស់ ឯកឧត្តមអភិបាលខេត្ត ក្នុងការដោះស្រាយបញ្ហាប្រឈមនានាជូនពលរដ្ឋដោយផ្អែកលើគោលការណ៍តម្លាភាព ជាពិសេសផ្តល់ការយកចិត្តទុកដាក់ខ្ពស់ចំពោះបងប្អូនយុទ្ធជនដែលកំពុងបំពេញភារកិច្ចការពារបូរណភាពទឹកដី។

សម្គាល់៖ រដ្ឋបាលស្រុកទឹកឈូ នឹងបន្តតាមដានករណីនេះយ៉ាងដិតដល់បំផុត ដើម្បីធានាឱ្យបាននូវដំណោះស្រាយប្រកបដោយបរិយាបន្ន និងបញ្ចប់ជម្លោះក្នុងរយៈពេលដែលបានគ្រោងទុក ៕