គ្រោះថ្នាក់ចរាចរណ៍នៅក្រុងកែប បណ្ដាលឱ្យមនុស្ស ២ នាក់ស្លាប់ និងរបួសធ្ងន់ ១ នាក់

កែប៖ ហេតុការណ៍គ្រោះថ្នាក់ចរាចរណ៍ដ៏រន្ធត់មួយបានកើតឡើងរវាងរថយន្តស្ទូច និងម៉ូតូ នៅលើកំណាត់ផ្លូវជាតិលេខ ៣៣ ស្ថិតនៅភូមិអូរក្រសារ សង្កាត់អូរក្រសារ ក្រុងកែប ខេត្តកែប បណ្ដាលឱ្យអ្នកបើកបរម៉ូតូ និងអ្នករួមដំណើរម្នាក់ទៀតស្លាប់បាត់បង់ជីវិត។

ករណីនេះបានកើតឡើងនៅថ្ងៃអង្គារ ១៤ រោច ខែអស្សុជ ឆ្នាំម្សាញ់ សប្តស័ក ព.ស ២៥៦៩ ត្រូវនឹងថ្ងៃទី ២១ ខែតុលា ឆ្នាំ ២០២៥ វេលាម៉ោង ៤:៤០ នាទីទាបភ្លឺ ត្រង់ចំណុចខាងលិចស្ពានវត្តចរិយាវង្ស ចម្ងាយ ៣៥,៥០ ម៉ែត្រ ចន្លោះបង្គោលគីឡូម៉ែត្រលេខ ១៤.១៥ ។

ដំណើររឿង៖
រថយន្តម៉ាក FUSO ពណ៌ស ពាក់ផ្លាកលេខ ភ្នំពេញ 3A.0815 ដែលកំពុងខូចចតនៅលើទ្រូងផ្លូវចំហៀងខាងស្តាំ ក្នុងទិសដៅពីលិចទៅកើត ដោយពុំបានដាក់ភ្លើងសញ្ញា។ អ្នកបើកបររថយន្តឈ្មោះ បិន ដា ភេទប្រុស អាយុ ៤៤ ឆ្នាំ មុខរបរអ្នកបើកបររថយន្ត រស់នៅភូមិកោះម៉ាក់ប្រាំង ឃុំបឹងសាលាខាងជើង ស្រុកកំពង់ត្រាច ខេត្តកំពត បានគេចខ្លួនពីកន្លែងកើតហេតុបាត់។

ម៉ូតូម៉ាក SUZUKI NEX ពណ៌ស-ក្រហម ផលិតឆ្នាំ ២០២៥ ពាក់ផ្លាកលេខ កំពត 1W.4009 បានធ្វើដំណើរស្របទិសគ្នាពីខាងលិច ហើយបានបុកគូថរថយន្តស្ទូចពីក្រោយចំហៀងខាងឆ្វេងពេញទំហឹង។

លទ្ធផលនៃគ្រោះថ្នាក់៖
អ្នកបើកបរម៉ូតូ បានស្លាប់នៅកន្លែងកើតហេតុភ្លាមៗ។
អ្នករួមដំណើរ បានរងរបួសធ្ងន់ធ្ងរ ហើយត្រូវបានបញ្ជូនទៅមន្ទីរពេទ្យខេត្តកែប តែក្រោយមកត្រូវបញ្ជូនបន្តទៅមន្ទីរពេទ្យខេត្តកំពត ហើយក៏បានស្លាប់បាត់បង់ជីវិតដែរ។

ជនរងគ្រោះទាំង ២ នាក់ (ដែលកំពុងស្រាវជ្រាវរកអត្តសញ្ញាណ និងក្រុមគ្រួសារ) ត្រូវបានយកទៅតម្កល់ទុកនៅមន្ទីរពេទ្យខេត្តកែប ដើម្បីរង់ចាំក្រុមគ្រួសារមកទទួលយកទៅធ្វើបុណ្យតាមប្រពៃណី។

មូលហេតុ: បណ្ដាលមកពីរថយន្តស្ទូចម៉ាក FUSO ពណ៌ស ខូចចតលើទ្រូងផ្លូវចំហៀងខាងស្តាំ ដោយមិនបានដាក់ភ្លើងសញ្ញា ឬបិទគំនូសសញ្ញាណាមួយដើម្បីប្រាប់អ្នកដំណើរពីក្រោយ ដែលជាហេតុធ្វើឱ្យម៉ូតូបើកបរស្របទិសបុកពីក្រោយបណ្ដាលឱ្យមានគ្រោះថ្នាក់ដល់អាយុជីវិត និងរបួសធ្ងន់តែម្ដង។

ចំណាត់ការ៖
វត្ថុតាងទាំងពីរគ្រឿងមាន រថយន្ត និងម៉ូតូ ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលក្រុងកែប ដើម្បីបន្តនីតិវិធី។

សមត្ថកិច្ចកំពុងបន្តស្រាវជ្រាវតាមចាប់អ្នកបើកបររថយន្តស្ទូចដែលបានរត់គេចខ្លួន និងស្វែងរកអត្តសញ្ញាណជនរងគ្រោះដើម្បីទាក់ទងទៅក្រុមគ្រួសារ ៕